Sambungan Part 2: Cucu Nek Ma Rambut
Masitah atau namo glemer eh Aunty Ita ponah satu ketiko dulu disengkelet dahi eh oleh Munajat@Muna, omak Meliza.
Masitah ni sememang eh dikenali sebagai jando yang stylo di kalangan penduduk kampung. Sering mengonokan
baju tshirt yang trendy, penampilan Aunty Ita tak ponah mengecewokan. Dengan pembukaan kodai salun gunting rambut yang pertamo seumpamo eh di kampung tu, namo Aunty Ita melonjak naik dari anak tangga numbo 9 dan toghuih ke tompek yang pertamo. Dongan kato lain, even namo ketuo kampung pun terpakso disingkir pado minggu ke-2 lantaran keglemeran Aunty Ita.
Saban hari salun Aunty Ita ni ponoh dongan pengunjung tak kigho laki ko pompuan. Majoriti eh dah tontu la oghang2 jantan yang mengidamkan tangan mulus Aunty Ita meghameh kepalo doghang. Apo tidak eh, sodangkan Wak Lu yang kepalo eh dah berpuluh tahun cumo ado beberapo urek rambut pun datang mengomih 'cinta' Aunty Ita.
Sehinggo la satu hari ni, datang la soghang jantan ni ke salun Aunty Ita. Dari jauh laie Aunty Ita dah nampak kelibat jantan ni yang tampak eh macho lagi jentelmen.
"Assalamualaikum..."
"Wah! Pertamo kali la ado jantan yang mulo pick up line dgn bagi salam...barang baek ni!" dotik ati kocik Aunty Ita seraya menjawab salam jantan tu.
"Silalah duduk tuan. Tuan nak gaya macam mana ye?" tanyo Aunty Ita dgn sogho yang sajo dilomakkan.
"Err..I tak kesah sebenarnya... asal sedap mata memandang pun cukuplah," koba jantan tu sambil tersonyum neves apobilo Aunty Ita memogang kepalo eh.
Dari situ bermulolah perkenalan di antara Aunty Ita dengan jantan itu, Nuwa. Ternyato Nuwa ni memang soghang jantan yang jentelmen sejentel penampilannya. Tambah pulak Nuwa dianugerahkan Tuhan kelobihan mulut manih, pandai bermain kato bermain lidah.
Nak dijadikan cito, adolah pulak mato-mato tak bertauliah yang menyampaikan perihal kemesraan mereka berduo kepado gefren Nuwa, Muna. Ado la pulak mato-mato yang pandai sikit tu, disnap eh gamba Aunty Ita tongah micit kepalo Nuwa.
Apo laie, memang membagho la jiwo wanita Muna bilo dijolok an gamba tu. Dicapai eh selendang kuning yang tergantung di topi lemari lantas bergogeh dio ke salun Aunty Ita.
Sampai yo kek sanun, kebetulan la pulak takdo sesapo kek kodai tu melainkan Aunty Ita seorang la jua. Ini peluang baik, cotuih hati Muna yang dah gogham bona tunggu melotup yo.
"Pompuan murahhhhhh!!!!"
Tanpa sebarang warning mahupun semboyan kecemasan, Muna menyengkelet dahi Aunty Ita sekuek-kuek ati. Bagai nangko dah busuk, Aunty Ita tersombam ke lantai salun.
"Kau anak sapo?"
