Sesambung Part 1: Bebughak Dengan Pembongak

Sorong papan tarik papan
Papan patah!

Asan Aleks tersongeh sensorang bilo dio ternampak anak cicak bergurau dengan seekor anak cicak yang lain sampai terjatuh dari atap. Dan dan dio tingat zaman dio bebudak maghin.

Maso tu dio gomok cam panda. Takdo sesapo anak dagho yang tingin la nak bermanjo main tampar-tampar dengan dio. Kok main jugak, memang tak pasal-pasal masuk spita kono penampar gomok Asan Aleks.

Tiap potang Asan Aleks balik dari kelas mengaji abu tausi sensorang yo sambil tersongeh pun sensorang yo. Saat dio tongah sibok mandang buah manggo yang lobek kek dusun Pak Jimba sambil tolan air liur pasal dio poso sunat omak eh suruh pasal gomok bona bia kughuih sikit, saat itu la Asan Aleks terlangga satu lembago yang buleh tahan bosa eh.

Asan Aleks tersombam ke tanah muko dulu ontah macam mano tak tau la tompi memang muko dulu.

"Adoiiiii!!!!" erang Asan Aleks ala manjo-manjo oghang gomok. Bingkeh dio bangun tompi terduduk balik tak terdayo ngangkek badan eh sendiri.

"Awak ok?"

Sogho lunak-lunak basah tu ternyata dapek mempengaruhi Asan Aleks untuk melibehkan pandangan eh ke arah datangnya sogho tu.

Arakian tersobut la dalam kitab gurindam jiwo karangan Suhaimi Suhakam bahawa pemilik sogho lunak-lunak basah tokak tu memiliki wajah yang bosa sebosa sanggul di ghambut eh:

Kulit licin bak tolo dikupeh
Dahi jondul bak tupi mengkuang
Hidung pesek 87 darjah
Mato eh galak bak ghimau lapa

Begitulah seperti yang dihikayatkan pemilik sogho yang didonga oleh Asan Aleks itu.

"Kau ni anak sapo?"

(Bersambung...)